នៅខណៈរបបផ្តាច់ការនៅអ៊ីរ៉ង់ឈានដល់ការសម្លាប់ប្រជាជនរបស់ខ្លួនដែលផ្ទុះការតវ៉ា ពិភពលោកកំពុងសម្លឹងមើលអ៊ីរ៉ង់កំពុងក្លាយជាប្រទេសមួយដែលលែងតំណាងភាពស្របច្បាប់ដល់ប្រជាជននិងអធិបតេយ្យភាពរបស់ខ្លួនទៀតហើយ ។
អធិកាបតីអាល្លឺម៉ង់លោក Friedrich Merz បានចេញសារប្រាប់ទៅកាន់ពិភពលោកថា របបសាធារណរដ្ឋឥស្លាមអ៊ីរ៉ង់បច្ចុប្បន្ននេះមិនមានភាពសក្តិសមក្នុងការតំណាងឱ្យប្រជាជនរបស់ខ្លួនដោយភាពស្របច្បាប់នោះទេ ខណៈលោកចោទសួរថាតើនៅសល់រយៈពេលប៉ុន្មានថ្ងៃទៀតដែលរដ្ឋាភិបាលនៃរបបនេះនៅមានជីវិត។ អធិកាបតីអាល្លឺម៉ង់លោក Friedrich Merz ក៏បានលើកឡើងថាប្រជាជនកំពុងតែងើបឡើងប្រឆាំងនឹងរបបនេះ។
Thank you for reading this post, don't forget to subscribe!
ជាការឆ្លើបតបនឹងសាររបស់អធិការបតីអាល្លឺម៉ង់ រដ្ឋមន្ត្រីការបរទេសអ៊ីរ៉ង់លោក Abbas Araghchi បានថ្កោលទោសសហព័ន្ធអាល្លឺម៉ង់ជាមួយនឹងសារបង្ហោះនៅលើបណ្តាញសង្គមរបស់ខ្លួនឱ្យដឹងថា ក្នុងចំណោមរដ្ឋាភិបាលទាំងអស់ រដ្ឋាភិបាលមួយនៅអាល្លឺម៉ង់ប្រហែលជារដ្ឋាភិបាលអាក្រក់បំផុតក្នុងការដោះស្រាយបញ្ហាសិទ្ធិមនុស្ស ។ ជាមួយគ្នានេះ លោក Abbas Araghchi ក៏បានលើកឡើងជាការចោទសួរថានៅពេលដែលអ៊ីរ៉ង់កម្ចាត់ក្រុមភេរវករដែលសម្លាប់ជនស៊ីវិលនិងមន្ត្រីប៉ូលីស អធិការបតីអាល្លឺម៉ង់បែរជាលើកឡើងថាអពើហិង្សានេះបង្ហាញពីកម្សោយ។ លោកបន្តសួរជាសំណួរថាតើត្រូវនិយាយពីអ្វីនៅពេលដែលលោកបង្ហាញការគាំទ្រទាំងស្រុងចំពោះការសម្លាប់ជនជាតិប៉ាលេស្ទីន៧ម៉ឺននាក់នៅហ្កាហ្សា។
លោក Abbas Araghchi បានបន្តថានៅពេលដែលសហរដ្ឋអាមេរិកចាប់ពង្រត់អតីតមេដឹកនាំវេណេហ្ស៊ូអេឡា នីកូឡាស ម៉ាឌូរ៉ូ ហេតុអ្វីរដ្ឋាភិបាលមួយចំនួននៅលើពិភពលោករួមទាំងអាល្លឺម៉ង់មិនថ្កោលទោស។ លោកអះអាងថារដ្ឋាភិបាលជាច្រើនកំពុងជំរុញវិធីសាស្ត្រស្តង់ដារពីរដោយមិនរួមគ្នាធ្វើការថ្កោលទោស បន្ទាប់ពីអាមេរិកចាប់ខ្លួនមេដឹកនាំវេណេហ្ស៊ូអេឡា ខណៈលោកក៏ជំរុញឱ្យអាល្លឺម៉ង់បញ្ឈប់ជាបន្ទាន់នូវការលូកដៃចូលមកជ្រៀតជ្រែកកិច្ចការផ្ទៃក្នុងនៅតំបន់មជ្ឈិមបូព៌ា។
គួរឱ្យដឹងថា មកទល់ពេលនេះមហាបាតុកម្មផ្ទុះឡើងនៅអ៊ីរ៉ង់បានឆក់យកអាយុជីវិតមនុស្សជិត២ម៉ឺននាក់ហើយ ខណៈបាតុករមួយចំនួនទៀតត្រូវបានជាប់ឃុំឃាំងនិងធ្វើទារុណកម្មផងដែរ បន្ទាប់ពីពួកគេបាននាំចេញមកតវ៉ានៅតាមបណ្តាទីក្រុងនានានៅទូទាំងប្រទេសទាមទារឱ្យរដ្ឋាភិបាលនៃសាធារណរដ្ឋអ៊ីស្លាមអ៊ីរ៉ង់ចុះចេញពីតំណែង។ ទន្ទឹមគ្នានេះសហគមន៍អន្តរជាតិក៏បានចេញមុខអំពាវនាវឱ្យសន្តិភាពកើតឡើងនៅអ៊ីរ៉ង់ ខណៈអ្នកសង្កេតការណ៍ជាច្រើនកំពុងដាក់ការរំពឹងថារបបផ្តាច់ការមួយនេះទំនងមិនអាចជៀសផុតពីការផ្តួលរំលំដោយអន្តរាគមន៍នៃកងកម្លាំងយោធារបស់សហរដ្ឋអាមេរិកនោះឡើយ។
វីដេអូព័ត៌មានពិស្ដារ៖
