មហាបាតុកម្មដ៏សាហាវ និងហិង្សានៅក្នុងប្រទេសអ៊ីរ៉ង់ ដែលបានចាប់ផ្តើមផ្ទុះឡើងតាំងពីថ្ងៃទី ២៨ ខែធ្នូ បានធ្វើឱ្យស្ថានភាពក្នុងប្រទេសនៅតំបន់មជ្ឈិមបូព៌ាមួយនេះកាន់តែតានតឹង ហើយនាំឱ្យមានការប៉ះទង្គិចដោយផ្ទាល់ជាមួយសហរដ្ឋអាមេរិក។
តាមសេចក្តីរាយការណ៍បានឱ្យដឹងថា បាតុកររាប់ពាន់នាក់ត្រូវបានសម្លាប់ មនុស្សច្រើនម៉ឺននាក់រងរបួសនិងចាប់ខ្លួនជិត២០០០០ ក្នុងអំឡុងពេលមានការបង្ក្រាបរបស់កងឆ្មាំបដិវត្តន៍ឥស្លាមមកលើប្រជាជនដែលមកប្រមូលផ្តុំគ្នាតវ៉ាតាមដងផ្លូវ។ការតវ៉ាទ្រង់ទ្រាយធំមិនធ្លាប់មាននេះ ត្រូវបានគេដឹងថាបានកើតឡើងបន្ទាប់ពីរូបិយប័ណ្ណអ៊ីរ៉ង់ធ្លាក់ចុះយ៉ាងខ្លាំង ដែលបានបង្កើនសម្ពាធលើស្ថានភាពសេដ្ឋកិច្ច និងការមិនពេញចិត្តក្នុងចំណោមប្រជាជនអ៊ីរ៉ង់ជាច្រើន។
ខណៈការសម្លាប់រង្គាលលើប្រជាជននៅតែបន្តកើនឡើងឥតឈប់ឈរ ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានទៅកាន់ទីក្រុងតេអេរ៉ង់ជាញឹកញាប់ថា ប្រសិនបើកងកម្លាំងសន្តិសុខអ៊ីរ៉ង់បន្តសម្លាប់បាតុករ ទីក្រុងវ៉ាស៊ីនតោនអាចពិចារណាធ្វើអន្តរាគមន៍យោធា ឬចាត់វិធានការដ៏តឹងរ៉ឹងបំផុត។លោក Trump បាននិយាយកាលពីថ្ងៃពុធថា លោកបានទទួលដំណឹងថា ការប្រហារជីវិតលើបាតុករប្រឆាំងរដ្ឋាភិបាលនៅអ៊ីរ៉ង់ កំពុងត្រូវបានផ្អាក។ លោកបានប្រាប់អ្នកសារព័ត៌មាននៅសេតវិមានថា ទោះបីជាព័ត៌មាននេះត្រូវការការបញ្ជាក់បន្ថែមក៏ដោយ ក៏អាជ្ញាធរអ៊ីរ៉ង់ត្រូវបានរាយការណ៍ថាបានបញ្ឈប់ការសម្លាប់បាតុករ។
ជាមួយគ្នានេះ ជើងហោះហើរជាច្រើនត្រូវបានសង្កេតឃើញថាបានចូល និងឆ្លងកាត់ដែនអាកាសរបស់ប្រទេសអ៊ីរ៉ង់ឡើងវិញ។ ស្របពេលនេះក៏មានសេចក្តីរាយការណ៍ឱ្យដឹងថា ក្រុមប្រឹក្សាសន្តិសុខអង្គការសហប្រជាជាតិបានបើកកិច្ចពិភាក្សាស្ថានភាពអ៊ីរ៉ង់ផងដែរ។ ក្រុមប្រឹក្សាសន្តិសុខអង្គការសហប្រជាជាតិ (UNSC) បានជួបប្រជុំគ្នានៅរសៀលថ្ងៃព្រហស្បតិ៍ ដើម្បីទទួលសេចក្តីសង្ខេបអំពីស្ថានភាពនៅក្នុងប្រទេសអ៊ីរ៉ង់ នេះបើយោងតាមអ្នកនាំពាក្យរបស់ប្រធានាធិបតីសូម៉ាលី ដែលកំពុងកាន់តំណែងប្រធាន ក្រុមប្រឹក្សាសន្តិសុខ។ កំណត់សម្គាល់តាមកាលវិភាគបានបញ្ជាក់ថា សេចក្តីសង្ខេបនេះត្រូវបានស្នើសុំពិនិត្យដោយសហរដ្ឋអាមេរិក។ប៉ុន្តែ កិច្ចរបស់ក្រុមប្រឹក្សាសន្តិសុខអង្គការសហប្រជាជាតិក៏ជាស្នើផងដែរដោយប្រទេសរុស្ស៊ីនិងចិន។
ប្រមុខការទូត Araghchi បានបដិសេធការអះអាងថា អាជ្ញាធរអ៊ីរ៉ង់នៅតែមានផែនការប្រហារជីវិតបាតុករ និងបានអះអាងថា “ថ្ងៃនេះ ឬថ្ងៃស្អែក មិនមានការព្យួរកបាតុករដែលបានចាប់ខ្លួននោះទេ”។ លោក Araghchi បានលើកឡើងដូចនេះជា ការឆ្លើយតបទៅនឹងការប្រកាសកាលពីថ្ងៃអង្គាររបស់លោក Trump ដែលបានព្រមានថាសហរដ្ឋអាមេរិកនឹងចាត់វិធានការតឹងរ៉ឹង ប្រសិនបើអ៊ីរ៉ង់អនុវត្តការប្រហារជីវិតបាតុករ។
បន្ថែមពីនេះ រដ្ឋមន្ត្រីការបរទេសអ៊ីរ៉ង់បានព្រមានប្រធានាធិបតី Trump កុំធ្វើ “កំហុស” ម្តងទៀត ដោយសង្កត់ថាទីក្រុង Tehran ត្រូវបានរៀបចំសម្រាប់ការទូត និងកម្រិតប្រយ័ត្ន។ក្នុងអំឡុងសម្ភាសន៍ជាមួយសារព័ត៌មានអាមេរិក Fox News លោក Araghchi ថា ប្រសិនបើមានការសាកល្បងវិធីសាស្ត្រដែលធ្លាប់បរាជ័យ លទ្ធផលនឹងមិនខុសពីមុនឡើយ ដោយសំដៅទៅលើការវាយប្រហាររបស់អាមេរិកលើទីតាំងនុយក្លេអ៊ែរចំនួនបីក្នុងប្រទេសអ៊ីរ៉ង់ ក្នុងអំឡុងជម្លោះរយៈពេល ១២ ថ្ងៃរវាងអ៊ីរ៉ង់ និងអ៊ីស្រាអែលកាលពីខែមិថុនាដែល អ៊ីរ៉ង់ថាមិនបង្កឱ្យខូចខាតអ្វីធ្ងន់ធ្ងរឡើយ។ អ៊ីរ៉ង់ចាត់ទុកថាជាបរាជ័យរបស់អាមេរិកនិងអ៊ីស្រាអែល។ តែអ្នកសង្កេតការណ៍ថា នេះជាចំអកឱ្យអាមេរិកនិងអ៊ីស្រាអែល ដែលការលើកឡើងបែបនេះ ហើយបើអ៊ីរ៉ង់បន្តបាញ់សម្លាប់បាតុករ និងកាត់ទោសប្រហារជីវិតបាតុករ ឬក៏មានករណីក្នុងហេតុផលសមរម្យ អាមេរិកអាចវាយប្រហារលើអ៊ីរ៉់ង់ដោយជៀសមុនរូចខណៈអ៊ីស្រាអែលក៏កំពុងចង់ឱ្យមានស្ថានការណ៍បែបនេះផ្ទុះឡើងផងដែរនោះ៕
