ចិនបញ្ជាក់ជាផ្លូវការថា យន្តហោះចម្បាំង J-10 ពិតជាបានបាញ់ទម្លាក់យន្តហោះ Rafale មួយគ្រឿងក្នុងសង្គ្រាមរវាងប៉ាគីស្ថាននិងឥណ្ឌា
Thank you for reading this post, don't forget to subscribe!ទោះបីជារបាយការណ៍ជាច្រើនដែលថាប៉ាគីស្ថានបានបាញ់ទម្លាក់យន្តហោះឥណ្ឌាដោយប្រើយន្តហោះចម្បាំង J-10 ដែលផលិតនៅប្រទេសចិនត្រូវបានផ្សព្វផ្សាយអស់មួយរយៈពេលក៏ដោយ ក៏របាយការណ៍ទាំងនោះនៅតែមិនផ្លូវការ។ តែយ៉ាងណាឥឡូវនេះ ទីក្រុងប៉េកាំងបានទទួលស្គាល់ហេតុការណ៍នេះជាផ្លូវការថាជាការពិត។
រដ្ឋបាលវិទ្យាសាស្ត្រ បច្ចេកវិទ្យា និងឧស្សាហកម្មការពារជាតិរបស់រដ្ឋចិន SASTIND បានប្រកាសជាផ្លូវការថា នៅឆ្នាំ២០២៥ យន្តហោះចម្បាំង J-10 ដែលផលិតក្នុងស្រុក ពិតជាទទួលបានជ័យជម្នះក្នុងការប្រយុទ្ធតាមផ្លូវអាកាសជាលើកដំបូង។ ខណៈពេលដែលសេចក្តីថ្លែងការណ៍នេះមិនបានបញ្ជាក់ពេលវេលា ឬទីតាំងពិតប្រាកដនោះទេ ប៉ុន្ដែអ្នកវិភាគនិងឃ្លាំមើលព្រឹត្តិការណ៍អន្ដរជាតិស្ទើរតែទាំងអស់ប្រាកដជាសំដៅទៅលើការបាញ់ទម្លាក់យន្តហោះចម្បាំង Dassault Rafale របស់កងទ័ពអាកាសឥណ្ឌា ដោយកងទ័ពអាកាសប៉ាគីស្ថាន។
ជាពិសេស សេចក្តីថ្លែងការណ៍នេះ បានលើកឡើងថា យន្តហោះសត្រូវជាច្រើនគ្រឿងត្រូវបានបាញ់ទម្លាក់នៅក្នុងការប្រយុទ្ធតាមអាកាស។ តួលេខនេះស្ថិតនៅចន្លោះនៃការអះអាងរបស់ប៉ាគីស្ថានដែលថាយន្តហោះចម្បាំងឥណ្ឌាចំនួនប្រាំគ្រឿងដែលត្រូវបានបំផ្លាញ និងការវាយតម្លៃដោយអ្នកវិភាគលោកខាងលិចជាច្រើន ដែលជាទូទៅនិយាយអំពីការខាតបង់ទាំង២ប្រទេស។
ប្រទេសចិនក៏បានអះអាងផងដែរថា គ្មានយន្តហោះចម្បាំង J-10CE ណាមួយត្រូវបានបាត់បង់ក្នុងអំឡុងពេលប្រយុទ្ធនោះទេ។ មិនមានភស្តុតាងដែលអាចរកបានជាផ្លូវការដែលផ្ទុយនឹងការអះអាងនេះដោយផ្ទាល់មាត់នោះទេ ហើយជាទូទៅ ការបញ្ជាក់ដែលអាចទុកចិត្តបានអំពីការខាតបង់ផ្លូវអាកាសរបស់ប៉ាគីស្ថានគឺពិបាកទទួលបានណាស់។
មន្ត្រីចិនសង្កត់ធ្ងន់ថា ភាពជោគជ័យក្នុងការប្រយុទ្ធនេះបង្ហាញពីសមត្ថភាពរបស់ឧស្សាហកម្មការពារជាតិចិន និងជួយឲ្យវាបង្កើតទីផ្សារពិសេសមួយនៅលើទីផ្សារអាវុធសកល ដែលបង្កើនលទ្ធភាពនៃកិច្ចសន្យានាំចេញថ្មីនាពេលអនាគតដ៏ខ្លីខាងមុខ។
ការប្រយុទ្ធគ្នានេះក៏បានជំរុញឱ្យមានការចាប់អារម្មណ៍យ៉ាងខ្លាំងទៅលើយន្តហោះចម្បាំង JF-17 ផងដែរ ដែលជាយន្ដហោះចម្បាំងសហផលិតរវាងប៉ាគីស្ថាននិងចិន ។ បន្ថែមពីលើកិច្ចសន្យាដែលមានស្រាប់ជាមួយលីប៊ី យន្តហោះ JF-17 ត្រូវបានគេរាយការណ៍ថាកំពុងទាក់ទាញចំណាប់អារម្មណ៍ពីប្រទេសដទៃទៀត រួមទាំងប្រទេសឥណ្ឌូនេស៊ីផងដែរ។
ប្រទេសឥណ្ឌាទំនងជានឹងជំទាស់នឹងការអះអាងទាំងនេះ ដោយសារឥណ្ឌាធ្លាប់ បានរាយការណ៍ពីភាពជោគជ័យសំខាន់ៗរបស់ខ្លួនសូម្បីតែការកំទេចប្រព័ន្ធការពារដែនអាកាស S-400 របស់ប៉ាគីស្ថាន។ ទោះជាយ៉ាងណាក៏ដោយ ដោយសារតែខ្វះភស្តុតាងជាក់ស្ដែង និងការបដិសេធដំបូងរបស់ប្រទេសឥណ្ឌាអំពីការបាញ់ទម្លាក់យន្តហោះណាមួយ សេចក្តីថ្លែងការណ៍បែបនេះនៅតែអោយមហាជនខ្លះមិនជឿ។
គួររំលឹកឡើងវិញថា កាលពីខែឧសភា ឆ្នាំ២០២៥ យន្តហោះចម្បាំង J-10CE របស់កងទ័ពអាកាសប៉ាគីស្ថាន ត្រូវបានគេរាយការណ៍ថា បានបាញ់ទម្លាក់យន្តហោះចម្បាំង Dassault Rafale របស់ឥណ្ឌាមួយគ្រឿង ពីចម្ងាយប្រហែល ២០០គីឡូម៉ែត្រ ដោយប្រើមីស៊ីលវាយប្រហារពីអាកាសទៅអាកាស PL-15៕
