លោក ដូណាល់ត្រាំ នៅថ្ងៃចន្ទនេះបានស្បថចូលកាន់តំណែងជាប្រធានាធិបតីទី៤៧របស់អាមេរិកជាផ្លូវការ។ ក្នុងពិធីដ៏ឧឡារិកនេះលោកបានថ្លែងសច្ចាថានឹងចេញបទបញ្ជាឆាប់រហ័សឱ្យមានការកែប្រែគោលនយោបាយ រួមបញ្ចូលទាំងការបញ្ជូនជនចំណាកស្រុកគ្មានឯកសារត្រឹមត្រូវរាប់លាននាក់នៅសហរដ្ឋអាមេរិកឱ្យត្រឡប់ទៅប្រទេសកំណើតរបស់ពួកគេវិញ។
លោកប្រធានាធិបតីសហរដ្ឋអាមេរិកទី៤៧នេះក៏បានថ្លែងប្រកាសក្នុងសុន្ទរកថាស្បថចូលកាន់តំណែងរបស់លោកថា«យុគសម័យមាសរបស់អាមេរិកចាប់ផ្តើមហើយនៅពេលឥឡូវនេះ។ ចាប់ពីពេលនេះតទៅ ការចុះថមថយរបស់អាមេរិកលែងមានទៀតហើយ។ យើងនឹងដឹកនាំអាមេរិកឆ្ពោះទៅកាន់ជ័យជម្នះនិងជោគជ័យកម្រិតថ្មីមួយ។ គ្មានសុបិនណាដែលយើងមិនអាចសម្រេចបាននោះទេ។ យើងនឹងមិនរងការខូចខាត។ យើងនឹងមិនបរាជ័យនោះទេ»។
លោក ដូណាល់ត្រាំ អាយុ៧៨ឆ្នាំ គឺជាប្រធានាធិបតីទី២ បន្ទាប់ពីអតីតប្រធានាធិបតី Grover Cleveland ក្នុងទសវត្សរ៍១៨៩០ ដែលបានកាន់តំណែងប្រធានាធិបតីនៅអាណត្តិទី២ប៉ុន្តែមិនជាប់គ្នា។
លោកដូណាល់ត្រាំជាប្រធានាធិបតីចាស់បំផុតដែលស្បថចូលកាន់តំណែងជាប្រធានាធិបតី ដែលលោក Biden ពេលស្បថចូលកាន់តំណែងកាលពី៤ឆ្នាំមុនមានអាយុក្មេងជាងលោក Trump ៥ខែ។ លោក Vance អាយុ៤០ឆ្នាំ ដែលមុននេះលោកជាសមាជិកព្រឹទ្ធសភាមកពីរដ្ឋ Ohio បានស្បថចូលកាន់តំណែងជាអនុប្រធានាធិបតីទី៥០ និងជាអនុប្រធានាធិបតីក្មេងជាងគេទី៣ក្នុងប្រវត្តិសាស្ត្រ៕
