យោងតាមការចេញផ្សាយដោយសារព័ត៌មានThe Denfense post កាលពីថ្ងៃទី20ខែមករានេះបានអោយដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃចន្ទថា លោកបើកចំហក្នុងការពិភាក្សាអំពីជម្លោះនៅអ៊ុយក្រែនជាមួយរដ្ឋបាលអាមេរិកដែលចូលមកកាន់តំណែងក្នុងអាណត្តិថ្មីនេះ ។លោកសង្ឃឹមថាដំណោះស្រាយណាមួយនឹងធានាបាននូវ សន្តិភាពយូរអង្វែង។
លោក ដូណាល់ត្រាំ ដែលបានស្បថចូលកាន់តំណែងជាប្រធានាធិបតីអាមេរិកអាណត្តិថ្មីនៅថ្ងៃចន្ទទី20មករានេះ បានសន្យាថានឹងឈានទៅរកការសម្របសម្រួលដល់ភាគីទាំងសងខាង និងនាំមកនូវការបញ្ចប់យ៉ាងឆាប់រហ័សនៃសង្គ្រាមជិតបីឆ្នាំមកនេះ។
លោកពូទីនបានថ្លែងនៅក្នុងសុន្ទរកថាតាមទូរទស្សន៍ ដោយបានអបអរសាទរដល់គណបក្សសាធារណរដ្ឋនៅក្នុងពិធីសម្ពោធនៃការស្បថចូលកាន់តំណែងនាសេតវិមានរបស់ប្រធានាធិបតីសហរដ្ឋអាមេរិកទី47 ហើយលោកបានលើកឡើងថាយើងក៏បើកចំហផងដែរក្នុងការសន្ទនាជាមួយរដ្ឋបាលថ្មីរបស់សហរដ្ឋអាមេរិកស្តីពីបញ្ហាសង្គ្រាមនៅអ៊ុយក្រែន។
លោកបានបន្ថែមថាចំពោះការដោះស្រាយស្ថានការណ៍ ខ្ញុំចង់បញ្ជាក់ថាគោលដៅក្នុងការដោះស្រាយមិនគួរជាបទឈប់បាញ់មួយរយៈពេលខ្លីទេ ប៉ុន្តែជាសន្តិភាពយូរអង្វែងដែលផ្អែកលើការគោរពផលប្រយោជន៍ស្របច្បាប់របស់ប្រជាជន។
ទាក់ទិននឹងព័ត៌មាននេះ លោក Trump បានលើកឡើងកាលពីឆ្នាំមុនថាជម្លោះអ៊ុយក្រែន - រុស្ស៊ីកំពុងជ្រើសយកការស្លាប់ជាដំណោះស្រាយ ហើយលោកថា លោកនឹងបើកកិច្ចចរចាពិភាក្សាទៅកាន់ទីក្រុងម៉ូស្គូនិងទីក្រុង Kyiv ដើម្បីជៀសវាងពីសង្គ្រាមលោកលើកទី 3 ។
បុរសខ្លាំងពូទីនបាននិយាយថាលោកស្វាគមន៍ចំពោះ បំណងប្រាថ្នារបស់លោក ដូណាល់ត្រាំ ក្នុងការទប់ស្កាត់ការផ្ទុះឡើងនៃសង្គ្រាមលោកលើកទី 3 ។